Urban Klima 2050ek kostaldean egokitzeko ekintzak aurkeztu ditu COP28 konferentzian
2023/12/02
Ondare Naturaleko eta Klima Aldaketako zuzendari Adolfo Uriartek parte hartu du ‘Naturan Oinarritutako Kostaldeko Soluzioak: Egokitzeko aukerak’ izeneko saioan, eta Bakion, Bermeon eta Zarautzen garatutako jarduketen berri eman du.
Ekonomiaren Garapen, Jasangarritasun eta Ingurumen Saileko Ingurumen eta Jasangarritasuneko sailburuorde Aitor Aldasorok eta Ingurumeneko gaiei buruzko aholkulari Imanol Goenagak osatu dute Dubaira bidaia egin duen Eusko Jaurlaritzaren ordezkaritza, eta zenbait ekitalditan hartu dute parte.
Eusko Jaurlaritzak LIFE IP Urban Klima 2050 proiektua eraman du Nazio Batuen Klima Aldaketari buruzko 2023ko Konferentziara (COP28), zeina azaroaren 30etik abenduaren 12ra antolatu baita Dubain (Arabiar Emirerri Batuak).
Euskadiko klima-ekintzako proiekturik handiena da, eta euskal ordezkaritzak Euskadik klima-aldaketa murrizteko eta egokitzeko esparruan tokiko eta lurraldeko plangintzan duen ibilbide luzearen adibide gisa aurkeztu dituen esperientzietako bat da.
Klima Ekintzako Tokiko Gailurrean aurkeztu dute. Goi-bilera horrek abenduaren 1etik 2ra bitartean lider nazionalak eta azpinazionalak biltzen ditu, maila guztietan erabat integratutako ekintza klimatikoaren paradigma berri bat ezartzeko. Ekitaldi horretan, Euskadi 40 gobernu azpinazionalen eta eskualde-sareen ahotsaren buru izan da. Gobernu horiek adierazpen bateratu bat sinatu dute, ekintza klimatikoaren hedapenean duten funtsezko eginkizuna aldarrikatzeko, bai eta ekintza hori bizkortzeko aitorpen handiagoa ere.
Urban Klima 2050en neurriak Bakion, Bermeon eta Zarautzen kostaldea egokitzeko
Ostiralean, abenduaren 1ean, Adolfo Uriartek parte hartu du ‘Naturan Oinarritutako Kostaldeko Soluzioak: Egokitzeko aukerak’ izeneko saioan, Andaluziako eta Kataluniako beste ordezkari batzuekin batera, jardunbide egokiak partekatzearen bitartez ikaskuntza eta lankidetza sustatzeko.
Zehazki, Urban Klima 2050 ekimenaren baitan Euskadiko hiru udalerritan garatzen ari diren kostaldea egokitzeko ekintzak aurkeztu ditu Uriartek. Honakoak dira udalerriok: Bakio, Bermeo eta Zarautz. Bakioko proiektuaren xedea da uholdeen aurka babestea eta Estepona ibaiaren ingurumena hobetzea, eta horretarako padura bat eta uholde-baso bat sortzea ibilguaren ondoan, uhaldiek hirigunean izan dezaketen afektazioaren arriskua murrizteko. Bermeon, bestalde, lan egiten ari da Tonpoi naturagunea berreskuratzeko, eta, horretarako, hiri-periferiako azpiegitura berde bat garatuko da, hiriaren erdialdearen inguruan, publikoak erabiltzeko, eta klima-aldaketara egokitutako irizpideak izango ditu. Zarautzek aurrera jarraitu du udalerria klima-aldaketara egokitzeko eraztun berde urdinarekin, eta lan egiten ari da hiriaren kostaldea egokitzeko alternatibak aztertzeko.
Euskadiren parte-hartze aktiboa zenbait ekitalditan
Aitor Aldasoro Ingurumen Jasangarritasuneko sailburuordeak eta Adolfo Uriarte Natura Ondare eta Klima Aldaketako zuzendariak gidatutako ordezkaritzak Eusko Jaurlaritzak ezarritako politikei esker klima-aldaketara egokitzeko Euskadin lortutako aurrerapen nagusiak aurkeztuko dituzte goi-bilera horretan. Hain zuzen ere, Urban Klima 2050 eta Regions4 Climate proiektu europarrek, Kostaegoki proiektuak edota Klima Aldaketara Egokitzeko Misioko kide izateak eragin dute Euskadi Europar Batasunean esparru horretan lider gisa kokatzea.
COP28 honek esperientzia horiek partekatzeko balioko du, hainbat ekitalditan parte hartzeari eta nazioz azpiko beste gobernu eta eskualde batzuekin egindako aldebiko bileren agendari esker.
Agenda hasteko, Aitor Aldasoro sailburuordeak parte hartu du, Europako eta Latinoamerikako hirietako beste ordezkari batzuekin batera, honako mahai-inguru honetan: "Deskarbonizazioa eta erresilientzia Latinoamerikako eta Europako gobernu azpinazionaletan. Teoriatik inplementaziora". Gainera, Euskadik abenduaren 3an parte hartuko du Under2 Koalizioaren Batzar Nagusian, batzorde exekutiboko kide baita, eta abenduaren 6an Natura Ondare eta Klima Aldaketako zuzendariak Natura Kontserbatzeko Nazioarteko Batasunaren (UICN) pabiloian egingo diren bi ekitalditan parte hartuko du.
