Urban Klima 2050ek klima-aldaketaren arloan herritarrak ahalduntzeko plana azaldu du hezkuntza jasangarriko jardunaldi batean
2023/12/12
Eusko Jaurlaritzako Ekonomiaren Garapen, Jasangarritasun eta Ingurumen Sailarekin eta BBK Klimarekin lankidetzan, UN Etxeak sustatutako ‘Klima-hezkuntza: jasangarritasuna ekinean’ izeneko jardunaldian parte hartu du.
LIFE IP Urban Klima 2050 proiektuak herritarrak klima-aldaketaren arloan ahalduntzeko plana aurkeztu du hainbat eragileren aurrean, joan den abenduaren 1ean UN Etxeak, Eusko Jaurlaritzako Ekonomiaren Garapen, Jasangarritasun eta Ingurumen Sailarekin eta BBK Klimarekin lankidetzan, sustatutako ‘Klima-hezkuntza: jasangarritasuna ekinean’ jardunaldian.
Saioan, Malake Muñoz Cachón Ihobeko Ekintza Klimatikoko proiektuen arduradunak herritarrak ahalduntzeko plana aurkeztu du, klima-kontzientzia sustatzeko eta ekintzara igarotzeko, prestakuntzaren eta tresna berrien diseinuaren bidez aldaketa erraztuta. Planean jasotako jarduerak kontsumo arduratsuarekin, mugikortasun jasangarriarekin edo hiri-elementu naturalekin lotuta daude, besteak beste.
Muñozek azaldu zuenez, plan hau behar bezala egiteko zein publikori zuzentzen zaion zehaztu da, “klima-aldaketak ez duelako eragin bera mundu osoan”. Azterketa horrek ezartzen du, alde batetik, “Euskadin ekintza klimatikorako ahaldundutako biztanleria dagoela, klima-aldaketa arintzeak eta horretara egokitzeak duen garrantziaz erabat jabetuta”, eta, bestetik, beharrezkoa dela “herritarrek ingurumen-jokabideetara aurrera egiten laguntzea, hala nola mugikortasun jasangarriago eta eraginkorragora edo kontsumo arduratsuagora”.
Planteatutako estrategiak 5 helburu jasotzen ditu:
- INFORMAZIO objektiboa eta egiazkoa ematea errealitate klimatikoari, haren kausei eta ondorioei buruz.
- Pertsonei modu espezifikoan eta indibidualizatuan KOMUNIKATZEA, partaide senti daitezen.
- Ekintzara igarotzearen garrantziaz SENTSIBILIZATZEA pertsonak.
- Jarrera kritikoa eta ohituren eraldaketa sustatzen duten balioetan eta ezagutzetan HEZTEA.
- KLIMAREN ARLOKO ERABAKIAK HARTZEAN HERRITARREN PARTE-HARTZEA SUSTATZEA.
- TESTUINGURUA ALDATZEA, ekintza klimatiko indibiduala edo kolektiboa errazteko.
Planean sartzen diren helburuak 29 ekintzaren bidez garatuko dira. Ekintza horiek 2023an hasi dira zabaltzen, eta datozen urteetan ere jarraituko dute
