Urban Klima 2050 ekimenak ASTEKLIMA AZOKAN parte hartzera gonbidatzen ditu herritarrak klima-aldaketari buruz ikasteko
2023/09/19
Euskadiko Klimaren eta Energiaren Astearen (ASTEKLIMA 2023) barruan egingo da jarduera, eta irailaren 22tik urriaren 1era 9 euskal udalerritara iritsiko da.
Jolasen bidez, parte-hartzaileek klima-aldaketa arintzeko eta horretara egokitzeko beharraz ikasiko dute.
Astebetez, irailaren 22tik urriaren 1era, Euskadik dena emango du klima-aldaketaren erronkarako. Laugarren urtez, ASTEKLIMA, Klimaren eta Energiaren Astea, lurraldeko txoko guztietara iritsiko da, eta ehunka jarduera ekarriko ditu klima-aldaketa euskal herritarren agendan jartzeko, premisa honekin: ‘ekintza guztiek, txikiak izanda ere, axola dute’.
LIFE IP Urban Klima 2050 proiektuak ez du aste hori galdu nahi. Izan ere, kontzientzia klimatikoaren sustapena eta ekintzara bultzatzea dira, hain zuzen, bere helburu nagusietako batzuk. Hala, aste horretan, Urban Klima 2050ek ASTEKLIMA AZOKA antolatuko du, familiak klima-aldaketaren ondorioez kontzientziatzeko eta eguneroko ohiturak egokitzeak klima-aldaketa arintzeko duen garrantziaz jabearazteko.
Jolasen bidez, parte hartzen duten familiek klima-aldaketarekin lotutako hainbat gairi buruz ikasiko dute. Baita, beharrezkoa den trantsizio energetiko eta klimatikoaren aurrean, beren ohiturak nola egokitu ditzaketen eta aldaketa-eragile nola bihurtu daitezken ikasteko aukera izango dute ere. Gainera, ASTEKLIMA AZOKAK jarraipena izateko asmoa du, eta horretarako, 21 eguneko erronka planteatuko die familia guztiei, bakoitzak konpromisoa har dezan. Erronka onartzen duten familiek zozketa batean parte hartuko dute.
Jarduera hauek 4 eta 10 urte bitarteko haurrak dituzten familientzat dira batez ere, eta irailaren 22tik urriaren 1era bitartean 9 udalerritara iritsiko dira: EAEko hiru hiriburuak, Bakio, Trapagaran, Irun, Azpeitia, Zarautz eta Bermeo.
Astebete, 9 udalerri
Bilbao | 22/09/2023 | 16:00-20:00 | Plaza de las Mujeres 25 de noviembre. Calle Bailén 1
Bakio | 23/09/2023 | 10:00-13:00 | Bentalde Auzoa. Avda Sabino Arana
Trapagaran | 23/09/2023 | 17:00-20:00 | Arboleda
Irun | 24/09/2023 | 10:00-14:00 | Plaza del Ensanche
Azpeitia | 28/09/2023 | 16:00-20:00 | Plaza Nagusia
Vitoria-Gasteiz | 29/09/2023 | 16:00-20:00 | Plaza Santa Bárbara
Donostia/San Sebastián | 30/09/2023 | 10:00-13:00 | Plaza Gipuzkoa
Zarautz | 30/09/2023 | 17:30-20:00 | Itxas pasalekua-Matxitxako
Bermeo | 01/10/2023 | 10:00-14:00 | Lamera Parkea
