Klima-ekintzari buruzko LIFE proiektuen Europako bilerak bost gomendio eman ditu Europan egokitzapena eta deskarbonizazioa bizkortzeko

2026/10/7

Bilbon egindako topaketaren ondoren politika publikoen arduradunentzat egindako dokumentuak gobernantza, finantzaketa, lurralde-plangintza, gaitasunen sorrera eta parte-hartze soziala identifikatzen ditu Europako ekintza klimatikoan aurrera egiteko funtsezko faktore gisa. 

Ekintza klimatikoari buruzko LIFE proiektuen Europako topaketak, Bilbon 2026ko apirilaren 21etik 23ra bitartean egin eta CINEAk LIFE IP Urban Klima 2050 proiektuaren laguntzarekin antolatu denak, politika publikoen arduradunei zuzendutako dokumentu bat argitaratu du eta, bertan, LIFE proiektuen, Europako erakundeen, administrazio nazionalen eta eskualdeko administrazioen, ikerketa-erakundeen eta klima-politiken ezarpenean inplikatutako beste eragile batzuen arteko truketik sortutako ondorio eta gomendio nagusiak jaso dira. 

Europan trantsizio klimatikoa azkartzeko teknologia eta baliabide ekonomikoak baino zerbait gehiago behar dela ondorioztatu du txostenak. Administrazioen arteko koordinazioa, klima-ekintza lurralde-plangintzan integratzea, finantziazioa lortzea, tokiko gaitasunak indartzea eta gizartea inplikatzea faktore erabakigarriak dira estrategiak eta planak lurraldearen gaineko jarduera zehatz bihurtzeko. 

1. Maila anitzeko gobernantza egonkorra eta iraunkorra indartzea 

Topaketaren ondorio nagusietako bat izan da zatiketa administratiboa eta ziklo politikoak oztopo izaten jarraitzen dutela klima-estrategiak eraginkortasunez ezartzeko. Parte-hartzaileen ustez gobernu-mailen artean koordinatzeko mekanismo formalak finkatu behar dira, politiken jarraipena bermatzeko eta haien aplikazioa lurraldean hobetzeko. Txostenak, gainera, LIFE Proiektu Estrategikoak administrazioen, agentzien eta tokiko erakundeen artean lankidetza-egitura iraunkorrak sortzeko tresna eraginkorrak direla nabarmentzen du.  

2. Klima-ekintza lurralde-plangintzan integratzea 

Klima-aldaketaren egokitzapena eta arintzea lurralde- eta hirigintza-antolamenduko tresnetan txertatzearen garrantzia azpimarratzen du dokumentuak. Horretarako, klima- eta energia-planen eta hiri- eta lurralde-garapena arautzen duten arau-esparruen arteko lotura indartzea proposatzen du. Parte-hartzaileek adierazi zuten tresna horiek gehiago integratzeak aukera emango lukeela egokitze-neurrien inplementazioa bizkortzeko eta epe luzerako plangintza koherenteagoa errazteko. 

3. Finantzaketarako sarbidea eta koordinazioa hobetzea 

Europako eta estatuko programa ugarik finantzaketa ematen badute ere, txostenak ohartarazi du sakabanaketak administrazio eta tokiko erakunde askok finantzazio hori eskuratzea zailtzen jarraitzen duela. Dokumentuak LIFE, Kohesio Funtsak, Horizon Europe edo Klimarako Gizarte Funtsa bezalako tresnen arteko sinergiak indartzea gomendatzen du, baita proiektuen emaitzak inbertsioa jaso dezaketen eta eskala handiagoan erreplika daitezkeen ekimen bihurtzeko gaitasuna hobetzea ere. 

4. Gaitasun teknikoak eta etengabeko laguntza sendotzea 

Langileen errotazio handia eta tokiko administrazio askoren muga teknikoak dira identifikatutako beste erronketako bat. Txostenean nabarmentzen denez, etengabe inbertitu behar da profesionalen eta erakundeen trebakuntzan, klima-jardueren jarraitutasuna bermatzeko. Esperientzia eraginkorrenen artean daude eskualdeko errazte-sareak, berdinen arteko prestakuntza-programak, klima-aholkularitzako zerbitzuak eta udalerriei eta tokiko beste eragile batzuei laguntzeko leihatila bakarrak deiturikoak. 

5. Herritarrak inplikatzea irtenbideen diseinutik 

Alderdi interesdunen parte-hartzea funtsezko elementua da klima-neurrien onarpen soziala handitzeko eta erantzukidetasun-sentimendua sendotzeko. Dokumentuaren arabera, herritarren, enpresen eta sektore ekonomikoen inplikazio goiztiarrak konfiantza sortzea eta aldaketarekiko erresistentziak murriztea ahalbidetzen du. Gainera, klima-ekintza herritarrentzat dituzten onura jakinetatik abiatuta jakinaraztea gomendatzen du, hala nola osasuna hobetzea, arriskuak murriztea, dirua aurreztea edo bizi-kalitatea hobetzea, batez ere ingurumenarekiko sentsibilizazio-maila txikiagoa dagoen testuinguruetan.  

Naturan, deskarbonizazioan eta hiri erresilienteetan oinarritutako soluzioak 

Gomendio horiekin batera, txostenak ikasgai espezifikoak jasotzen ditu hainbat arlotan, hala nola naturan oinarritutako soluzioetan, funtsezko sektoreen deskarbonizazioan eta hiri erresilienteen eraikuntzan. Besteak beste, uholde arriskuak murrizteko, kostaldeko erresilientzia hobetzeko eta biodibertsitateari mesede egiteko naturan oinarritutako soluzioen potentziala nabarmentzen da, baita energia, mugikortasun, hirigintza eta lurzoruaren erabilera politikak lotuko dituzten ikuspegi integratuak bultzatzeko beharra ere. Halaber, datu klimatikoen eskuragarritasuna eta analisi-tresnak arriskuak aurreikusteko eta erabakiak hartzeko funtsezko elementu gisa identifikatzen ditu. 

Dokumentu osoa topaketaren webgunean kontsultatu eta deskargatu daiteke: https://urbanklima2050.eu/eu/life-platform-meeting/