Azken urteotan, naturan oinarritutako konpobideak (NOK edo NbS, ingelesezko siglak) sarritan erabili dira hiria berroneratzeko esku-hartzeetan, gure hiri-inguruneen erresilientzia eta erosotasuna hobetzeko, eta, hala, ingurumen-kalitatea eta ekosistemen funtzio kulturalak hobetzen lagundu da, pertsonen osasuna eta ongizate fisiologikoa, soziala eta mentala barne. Baterako onura horiek ebaluatzeko, haien gainean ez baitago literatura askorik, NbS-CoBAs erreminta garatu da. Besteak beste, honako onura hauek aurreikusten dira: lehengoratze psikologikoa, gizarte-kohesioa, kide izatearen zentzua, segurtasunaren pertzepzioa edo ingurumen-justizia. Hala ere, tresna hori ez da ezer erabiltzen ez bada; izan ere, hiri-naturalizazioaren onura psikosozial horiek zein diren jakiteko, beharrezkoa da toki horietako erabiltzaileek beren pertzepzioa partekatu ahal izatea. Hori dela eta, azterketa honetan parte hartzera gonbidatzen zaitugu, eta gurekin partekatzera Euskadin hautatu diren hiri-eremu publikoetako batzuei buruz dituzun iritziak.

NOKen baterako onuren azterketa bereziki lotuta dago NBEren Garapen Jasangarriko Helburu (GJH) hauekin: osasunari eta ongizateari buruzko 3. GJH, desberdintasunak murrizketari buruzko 10. GJH, hiri eta komunitate jasangarriei buruzko 11. GJH eta klimaren aldeko ekintzari buruzko 13. GJH.

Oinpean dugun lurzoruak funtzio eta zerbitzu ekosistemikoak ematen ditu, Lurrean bizitzea ahalbidetzen dutenak. Lurzoruak klima-aldaketari aurre egiten eta horretara egokitzen ere laguntzen du.

Lurzoruak planetako karbono kantitatearen laurdena dauka. Era berean, biologikoki dibertsoena den konpartimentua da, organismo-sorta zabala baitu, eta horien balio funtzionalak lurzoruaren emankortasuna, elikagaien ekoizpena eta uraren atxikipena hartzen ditu, besteak beste.

Zoritxarrez, lurzoruek betetzen duten funtzioa ez da behar bezala onartu eta baloratu klimari eta ingurumenari buruzko eztabaidetan. Orain zuk hori aldatzen lagun dezakezu, LURZAINen bidez zure lurzoruaren osasuna neurtuz eta gure baliabiderik baliotsuenetako bati buruz daukagun informazioa handituz: LURZORUA.

Lurzoruaren osasunaren azterketa bereziki lotuta dago NBEren Garapen Jasangarriko Helburu (GJH) hauekin (guztiei zeharka laguntzen dien arren): pobrezia desagerrarazteari buruzko 1. GJH, goserik ez buruzko 2. GJH, osasunari eta ongizateari buruzko 3. GJH, ur garbiari eta saneamenduari buruzko 6. GJH, ekoizpen eta kontsumo arduratsuari buruzko 12. GJH, klimaren aldeko ekintzari buruzko 13. GJH eta lehorreko ekosistemetako bizitzari buruzko 15. GJH.

Lurraldeak jasaten duen fenomeno klimatiko komunik suntsitzaileenetako bat kazkabarra da. Azken urteotan, hainbat gertakarik kalteak eragin dituzte etxebizitzetan, ibilgailuetan, laborantzetan eta baita pertsonengan ere, baina, zorionez, azken horiek ez dira heriotzak izateko bezain larriak izan.

Behaketek eta garatutako ereduek adierazten dute klima-aldaketa kazkabar-itxurako prezipitazioen maiztasuna eta tamaina handitzen ari dela, eta, beraz, etorkizunean mehatxu horrekin bizi behar dugula.

Gaur egun, Euskalmetek kazkabarra detektatzeko hainbat tresna ditu, hala nola radar meteorologikoa eta sentsore bereziak hainbat estaziotan. Modelizazio- eta iragarpen-gaitasunak erabiliz, ekaitz potentzialki suntsitzaileen abisuak igortzen dira “Neurrira egindako abisuak” zerbitzuaren bidez. Hala ere, kazkabarraren portaera lokala eta iragankorra dela eta, mugak daude egin daitezkeen neurketetan.

Orain, Minka/KazkaApp-ekin hori aldatzen lagun diezagukezu. Herritarren zientziari buruzko proiektu honen bidez, parte hartu nahi duten pertsonak gonbidatzen ditugu, ateratzen dituzten kazkabarraren argazkiak bidaliz. Gertakariaren lekua, data eta ordua eta kazkabarraren gutxi gorabeherako tamaina erregistratu nahi ditugu.

Helburu nagusia epe laburreko abisuak hobetzea eta eragindako kalteak saihestea edo murriztea da. Epe luzera, kazkabarra duten ekaitzen intzidentzian eta kazkabarraren tamainan klima-aldaketak duen eragina ezagutzen lagunduko da.

Kazkabarraren jarraipen-proiektuak NBEren Garapen Jasangarriko Helburu (GJH) hauei laguntzen die: hiri eta komunitate jasangarriei buruzko 11. GJH, klimaren aldeko ekintzari buruzko 13. GJH, helburuak lortzeko aliantzei buruzko 17. GJH, eta beste helburu batzuk, hala nola goserik ez buruzko 2. GJH, osasunari eta ongizateari buruzko 3. GJH, eta kalitatezko hezkuntzari buruzko 4. GJH.