Gernikak 62 ekintza proposatu ditu berotegi-efektuko gasen emisioak eta energia-kontsumoa murrizteko
2023/03/10
- Jarduerak egun garatzen ari den udalerriko Klima Aldaketa Arintzeko eta horretara Egokitzeko Plan Integratuaren (KAAEPI) parte dira, LIFE IP Urban Klima 2050 proiektuarekin bat datorrena.
Klimaren neutraltasuna lortzeko ahaleginean, 62 ekintzaz osatutako ibilbide-orria jarri du martxan Gernikak. Ibilbide-orri horretan, energia-eraginkortasuneko ekimenak aplikatuz, energia berriztagarriak ezarriz eta klima-aldaketarekiko erresilientzia handituz, aurreztera bideratutako berariazko estrategiak jasotzen dira.
Ibilbide-orri hori Klima Aldaketa Arintzeko eta horretara Egokitzeko Plan Integratua (KAAEPI) da. Berotegi-efektuko gasen emisioak murrizteko nazioartean eta autonomia-erkidegoan ezarritako helburuekin bat egiteko erabiliko du Gernikako Udalak, eta LIFE IP Urban Klima 2050 proiektuarekin bat dator.
Ekintza Plana egin aurretik, 2022an, Gernikako Udalerriaren abiatze-egoera hiru eremutan deskribatzeko diagnostikoa egin zen:
- Gernikako Udalaren energia-kontabilitatea eta karbono-aztarna.
- Udalerriko arintze-diagnostikoa.
- Gernika-Lumoko egokitzapen-diagnostikoa.
Gainera, plana egiteko, herriak parte hartzeko prozesua antolatu da, herritarren parte-hartzea bultzatzeko, ideiak trukatzeko eta interesa duten elkarte, erakunde eta eragileen ekarpenak jasotzeko. Dokumentua martxoaren 19ra arte egongo da zabalik udalaren web orrian, herritarrek parte hartu dezaten.
Planak 5 helburu proposatzen ditu:
- 2030erako, udalerriko BEGen emisioak erreferentzia-urtearekiko gutxienez %55 murriztea.
- Udal eraikinek kontsumitzen duten energiaren (elektrikoa eta termikoa) %32 gutxienez jatorri berriztagarritik ekoitziko dela ziurtatzea.
- Administrazio publikoaren energia-kontsumoa gutxienez %35 murriztea.
- Udal-eraikinen %40k B energia-kalifikazioa izango dutela bermatzea.
- Klima-aldaketak eragindako arriskuak murriztea eta udalerriaren eta biztanleriaren erresilientzia bermatzea.
Helburu horiek lortzeko, planak guztira 62 ekintza proposatzen ditu, 16 programatan egituratuak, eta 7 ildo estrategikotatik datozenak.
- Ereduzko administrazio publikoa: besteak beste, udal-eraikinetako argiztapen-sistemak eta kaleetako argiteria hobetzeko ekintzak, edo %100 elektrikoa den hiri-garraio kolektiboaren aldeko apustua.
- Bidezkoa eta jasangarria den energia-eredu bateranzko trantsizioa: ekintzen artean, hauek nabarmentzen dira: hiri-garapen berrietan energia-eraginkortasuneko irizpideak sartzea, eraikin pribatuen birgaitze energetikoa bultzatzea, edo tokiko energia-komunitateak sustatzea.
- Emisiorik gabeko mugikortasun jasangarria sustatzea: Mugikortasun Jasangarriko Plana idaztea, bizikleta-bide berriak irekitzea eta hiri-espazioak oinezkoentzat moldatzea.
- Hondakin gutxiago sortzea eta haien kudeaketa birziklapenaren bidez optimizatzea.
- Uraren ziklo osoa optimizatzea: uraren kudeaketaren eta erabileraren eraginkortasuna bermatzeko programak ezarriko dira eta uholdeen arriskua murrizteko konponbideak gauzatuko dira.
- Hiriko natur ingurunea zaintzea eta hiri-bilbe erresilientea sustatzea: hirigintzako plangintzan eta eraikuntzari buruzko araudian klima-aldaketaren ondorioak arintzeko eta horretara egokitzeko irizpideak integratuko dira, ekosistema narriatuak lehengoratzea sustatuko da eta klima-aldaketaren aurrean kalteberak diren bertako espezieak babestuko dira, besteak beste.
- Klima-aldaketaren inguruko erresilientzia eta sentsibilizazioa eta kontsumo-ohitura arduratsuak: udaleko larrialdi-plana eguneratuko da, arrisku klimatikoak eta mehatxu klimatikoei aurre egiteko abisu-sistemak sartuz, eta klima-aldaketaren ondorioak arintzeko eta horretara egokitzeko kontzientziazio-programak garatuko dira hainbat arlotan.
