400 pertsonak baino gehiagok hartu dute parte Gasteizen Ingurugiro Gaietarako Ikastegiak antolatutako Elikaduraren XV. Gizarte Topaketan
2022/09/28
Ekitaldia, LIFE IP Urban Klima 2050 proiektuaren helburuekin bat datorrena eta horren bazkide den erakunde batek sustatu duena, Europako Batasuneko hazkunde iraunkorreko estrategian urratsak egiten jarraitu nahi du.
400 pertsonak baino gehiagok hartu dute parte irailaren 20tik 24ra Gasteizen Elikaduraren XV. Gizarte Topaketa ospatzeko antolatutako ekitaldietan. Gasteizko Ingurugiro Gaietarako Ikastegiak antolatu du ekitaldia, LIFE IP Urban Klima 2050 proiektuaren bazkide eta bere helburuekin bat datorren erakundea dena. Halaber, ekitaldiak Europar Batasunaren hazkunde iraunkorraren eta integratzailearen estrategiaren norabidean urratsak egiten jarraitu nahi du.
Lehen hitzordua irailaren 20an izan zen, astelehena, Landatxo Gizarte Etxean, hirian elikadura-sistema berri baten beharra eztabaidatzeko. Bi deialdi egin ziren: “Gasteiz Iberiar penintsulako eta nazioarteko nekazaritzako elikagaien birsorkuntzaren panoraman” hitzaldia, eta “HortiReg proiektua. Hiri inguruko nekazaritza birsortzaileak elikadura-sistema berri bati egindako ekarpena Gasteizen” solasaldia.
Irailaren 22an, osteguna, Olarizuko Lorategi Botanikoko etxaldera lekualdatu zen ekitaldia, eta, han, hiri-ekologiako gela bat egin zen Euskal Herriko Hazien Sarearekin, barietate tradizionalei buruzkoa. Bertan, irin ekologikoekin eta tokiko irinekin egindako ogiak dastatu ziren.
Uztaren festak amaiera eman zien topaketa horiei Urarteko baratzeetan, Abetxukon, ekoizleen azoka batekin, kontzertuekin eta herri-bazkari batekin.
Ekimen hori Europako Itun Berdearen barruan kokatzen da, zeinaren helburua elikadura-sistema iraunkorragoa bultzatzea den eta, hala, ingurumen- eta klima-aztarna %55 murriztea 2030 baino lehen.
IGIko lehendakari den Ana Oregik nabarmendu duenez, “nekazaritzako elikagaien estrategia Gasteizko agendan dago, elikadura-sistemen eragin orokorrari aurre egiteko baliabide gisa. Duela urte batzuk garatu genuen, eta geratzeko etorri da. 2007az geroztik, topaketa hau ospatzen dugu, gure hirian tokiko elikadura iraunkorragoa eta kontsumo kontziente eta arduratsuagoa sustatzeko. Funtsezkoa da herritarrak beren elikaduraren jatorrira hurbiltzea eta gure tokiko ekoizleen lanari balioa ematea”.
